मेहर करी ने पधारो रावळ मालजी, धीर पुरुष थांरो ध्यान धरे। संत करे सेवा सेवक जन सिमरे कनक कलश लई आरती करे।।

मेहर करी ने पधारो रावळ मालजी ।
मेहर करी ने पधारो मल्लीनाथ जी ।।

अलख अलख बोलो होवे रे आरती, जय जय जय मल्लीनाथ जठै।
कुंकुं केरा चरण पेरण ने केशरिया, अवल तणो आधार अठै ।।

मेहर करी ने पधारो रावळ मालजी ।
मेहर करी ने पधारो मल्लीनाथ जी ।।

मालाणी रा भूप रावळ गढ़ मेहवे, अलख घणी ने घ्यायो आप अठै।
सगत सरूपी राणी रूपांदे सजोडे, जुगत सूं पूगा निज धाम जठै ।।

मेहर करी ने पधारो रावळ मालजी ।
मेहर करी ने पधारो मल्लीनाथ जी ।।

शूरा पूरा संत साधक हर सेवक, सुघड़ साघुड़ा मांही नाम सरे ।
राजा इक जनक विदेही जेवो रावळ, मेख धरी ने मन मोद भरे ।।

मेहर करी ने पधारो रावळ मालजी ।
मेहर करी ने पधारो मल्लीनाथ जी ।।

मेहवे गढपति राणी रूपांदे रो मेलो, घारू मेघ धणियां रा ध्यान धरे ।
ऊगमसी पधारे गुरू सत्तरे आंगणिये, कामड़िया साधुड़ा थांरा भजन करे।।

मेहर करी ने पधारो रावळ मालजी ।
मेहर करी ने पधारो मल्लीनाथ जी ।।

राम घणी आया रावत आया रणसी, आया बाळीनाथ जोगी छेलणसी अठै।
कुम्मो राणो लिरल बाई खीमड़ो जी कोटवाळ, जैसल तोरल करी जातरा जठे।।

मेहर करी ने पधारो रावळ मालजी ।
मेहर करी ने पधारो मल्लीनाथ जी ।।

मेळो मालाजाळ हरि नाम रा मोतिडा, कर्म सुभागी ज्यांरा पाप कपै प्रेम रस पीधा सत वचनों रा प्याला, तखत त्रिवेणी ऊपर आप तपै ।।

मेहर करी ने पधारो रावळ मालजी।
मेहर करी ने पधारो मल्लीनाथ जी ।।

मळयो झीणो पंथ वैराग वाळो मारग, कठण जोग जन भजन करे।

दोय कर जोड़ कवि “काळू” गावै, संतो री शरण गया जीवन सरे ।
मेहर करी ने पधारो रावळ मालजी धीर पुरुष थांरो ध्यान घरे संत करे सेवा सेवक जन सिमरे, कनक कलश लई आरती करे।।

मेहर करी ने पधारो रावळ मालजी ।
मेहर करी ने पधारो रावल मालजी ।।

मेहर करी ने पधारो रावल मालजी ।
मेहर करी ने पधारो मल्लीनाथ जी।।